P45 mil kantidad sa drugas, armas nasakmit
CEBU, Philippines – Gisikop sa kapolisan ang usa ka lalaki human nakuhaan og pistola apil ang tulo ka dagku nga bulto sa drugas sa barangay Tisa, dakbayan sa Sugbo niadtong Domingo sa gabii.
Ang dinakpan naila nga si Eric Anthony La Peña, 32, ulitawo, wala’y trabaho ug nagpuyo sa maong lugar. Matud ni Senior Insp. Arthur Delo Rosa, hepe sa Punta Princesa Police, nga unang nakadawat og alarma ang iyang mga sakop kabahin sa duha ka lalaki kinsa usa niini ang armado.
Daling miresponde ang kapolisan sa lugar ug naabtan ang duha ka lalaki kinsa ang usa ang dali ug tulin kaayo nga nakadagan palayo ug gibiyaan si La Peña.
Si PO2 Henry Alejandrino nga nakabantay nga nibunot sa armas si La Peña ang dali nga nakapugong ug nahitabo ang komosyon hangtud naabtan sa ubang polis ug nasikop ang suspek.
“Mosukol gyod unta to siya pero na subdue lang sa sakop nato,” sigun pa ni Delo Rosa.
Narekober sa kapulisan ang usa ka .45 caliber pistol nga duna’y upat ka mga bala.
Apan sa pagrekisa sa kapolisan ila nakuha ang tulo ka bulto sa gituohang drugas nga duna’y kantidad nga P45,000.
Nasuta usab nga bag-o pa lang nakagawas sa bilanggoan sa kasong theft ang suspek.
Gikompirmar sa kapolisan nga nalambigit sab sa pagpamaligya og drugas ang suspek sa maong lugar ug sa mga sikbit nga mga lugar. – /GMR) (BANAT NEWS)
- Latest
