Florist gitulis gipatay

CEBU, Philippines – Usa ka negosyante nga florist ang nakit-an nga wala nay kinabuhi nga nakaangkon og mga samad dinunggaban sa lawas niini diha sa Barangay Day-as ning dakbayan sa Sugbo, kagahapon sa buntag.

Pagpanulis ang usa sa gidudahang motibo sa kapulisan sa nahitabong pagpatay ni Daniel “Jun” Cañete, 44, nga nagpuyo ug nag-abang sa ground floor sa VR Apartment nga nahimutang sa Sikatuna Street, Day-as. Ang hepe sa kapulisan sa dakbayan nga si Senior Superintendent Noli Romana mimando sa Homicide ug Theft and Robbery Section nga mohimo og hiniusang imbestigasyon sa mao’ng krimen.

Si Cañete nga lumad nga taga Pagadian City, duna kini duha ka mga anak lalaki ug buwag na sa asawa. Kini nakaangkon og daghang samad sa kalawasan partikular sa iyang tiyan, hinungdan nga nakabsan sa iyang kinabuhi.

Sa gihimo nga ocular inspection sa Homicide Section sa crime scene dunay gibanabana nga P250,000 nga salapi nga nawala sa drawer sa biktima, apil  sa nahanaw ang laptop, iphone ug lain pa nga mga cellphones niini. Si Cañete maoy tag -iya sa JMC Wedding Creation. Ang iyang patay nga lawas nadiskobrehan sa iyang empleyado nga si Ivy Medalle pasado alas -7 sa buntag.

Gidugang pa ni Medalle nga kasagaran duna’y mga bisita nga mga lalaki si Cañete panahon sa gabii. Niadtong Domingo sa gabii, nabantayan sa usa sa mga residente sa mao’ng lugar nga dunay usa ka lalaking mibisita ug misulod sa shop sa biktima.

Laing trabahante nga si Hernani Timtim mitug-an nga gibanabanang dunay P250,000 ang cash sa drawer ni Cañete nga ilang kinitaan  sukad pa niadtong Biyernes nga unta ilang ideposito sa bangko kagahapong adlawa. Si SPO4 Alex Dacua imbestigador sa Homicide Section mitug-an tulo ka oras nang patay sa dihang nadiskobrehan si Cañete. – /EIM) (BANAT NEWS)