Engkwentro 2 patay

CEBU, Philippines – Duha ang patay ug duha ang naangol lakip na ang hepe sa Boljoon Police, human sa nahitabong engkwentro sa kapulisan sa mao’ng lungsod ug sa mga armadong tawo sa Barangay San Antonio, Boljoon kagahapong adlawa.

Ang grupo ni Arnel Coronel maoy naengkwentro sa kapulisan sa Boljoon sa dihang nag-abot ang kapulisan ug ang mga armado sa maong lugar.

Matud pa ni Police Officer 2 Jocelyn Villega sa Boljoon Police nga nahinabi sa Banat News nga taudtaod na nga gi-surveillance ang maong dapit tungod sa report nga diha magburdohan ang grupo ni Coronel nga konektado sa grupo  sa mga nakaengkwentro sa hiniusang pwersa sa Regional Intelligence Division, Provincial Intelligence Branch ug Regional Special Operations Group atol sa pagronda sa Dalaguete ug Alcoy nga misangpot sa kamatayon sa tulo ug pagkasikop sa napulo, tulo ka adlaw na ang milabay.

Human nga nakompirma sa kapulisan nga didto nagtago ang grupo, dali gilayon nila nga  gisusi ang maong lugar nga gipangulohan ni Inspector Dexter Basirgo dala ang warrant of arrest batok ni Coronel sa kasong murder.

Apan sigun pa ni Villega nga nasugatan sa kapulisan ang grupo ni Coronel ug nahitabo ang binakbakay. “Udto nato sila (mga polis) milakaw sir halos pulo to sila ka buok, armado ‘to sila with long arms,” matud pa ni Villega.

Duna say nakuha nga impormasyon ang Banat News nga didto sa gipuy-an nga panimalay sa grupo ni Coronel nahitabo ang sinukliay sa bala.

Sa pagkutlo niini nga balita wala pa’y impormasyon ang Banat News kung kinsa ang miuna sa pagpabuto tali sa duha ka grupo.

Atol sa maong engkwentro patay ang giila nga leader sa grupo nga si Arnel Coronel ug si John Michael Mejares ug duna pa’y usa ang samdan nga wala pa nailhan.

Apan naangol ang hepe sa Boljoon Police nga si Basirgo human nga naigo sa bukton ug kilid, kini base sa text message nga gipadala gikan sa hepe sa Cebu Provincial Police Office (CPPO) Senior Superintendent Noel Gillamac dinhi sa Banat News.

Nakuha sa kapulisan gikan ni Coronel ang duha ka .45 pistols, samtang duha ka revolvers ug usa ka granada ‘sab ang nakuha gikan ni Mejares.

Wala pay saktong impormasyon ang kapolisan kun pila ka tawo ang ilang nakaengkwentro.  Nagpadayon pa ang imbestigasyon ug operasyon sa kapulisan sa maong lugar pagpangita sa mga kauban ni Coronel. – /EIM) (BANAT NEWS)