Ahente gitulis sa Liloan
CEBU, Philippines – Nagpakitabang sa kapolisan ang usa ka ahente sa kompanya sa sigarilyo human gitulis sa duha ka lalaki sa Greenhills, Poblacion, Liloan niadtong Sabado sa udto.
Ang biktima nailhan nga si Bobby Francisco, 33, ulitawo ug lumad nga taga Cellon, Bantayan.
Matud ni PO1 Eden Pepito, desk officer sa Liloan Police Station, nga nahinabi sa Banat News nga ang insidente ika-duha na human sa laing pagpanulis pipila ka buwan na ang nakalabay.
Sigun pa sa biktima nga human siya nangolekta ug naghatud sa ilang baligya kauban ang iyang drayber nga si Elmer Pepito, kalit lang miabot ang duha ka lalaki nga sakay sa motorsiklo dayun ti-on og.45 pistol.
Gikuha sa mga tulisan ang dala nga belt bag nga sulod ang P8,000 nga koleksiyon ug giapil sab og kuha sa mga tulisan ang P13,000 nga kaugalingong kuwarta ni Francisco.
Daling misibat ang mga suspek paingon sa dakbayan sa Sugbo.
Sumala pa ni Pepito nga dili taga Liloan ang mga tulisan.
Matud ni Pepito nga nakasuway sila og gukod og mga tulisan apan dali ra nga nahanaw gumikan sa kadaghang dalan lusot sa laing lugar. – /GMR) (BANAT NEWS)
- Latest
