P50 mil para sweldo gitulis

CEBU, Philippines – Angol ang usa ka trabahante dihang nisukol siya sa duha ka tulisan nga nikuha sa dala niyang bag nga may sulod P50 mil niadtong Sabado sa buntag sa Don F. Sotto Drive, Kamputhaw, dakbayan sa Sugbo.

Ang biktima naila nga si Rolando Puno, 34, taga dakbayan sa Danao ug nagtrabaho sa Joma Tech Corporation.

Sa inisyal nga imbestigasyon nasayran nga samtang naglakaw ang biktima pasado alas 10 sa buntag, kalit lang miduol kaniya ang duha ka tulisan nga nag-bonnet ug nag-jacket ug gibunlot ang dala’ng bag.

Nisukol ang biktima ug nahitabo ang komosyon apan usa sa mga tulisan ang nikuha og armas dayon pusil kaniya ug naigo sa iyang suwang.

Wala’y nahimo ang biktima kun dili ang paghatag na lang sa bag ngadto sa duha ka tulisan nga dali sab nga misibat sakay sa usa ka motorsiklo subay sa Gorordo Avenue samtang ang biktima ang dali nga gidala sa Perpetual Succour Hospital.

Sigun pa ni PO2 Phillip Plasus, desk officer sa Fuente Police Station, nga ang biktima nagduda nga guwardiya sa ilang kompanya ang usa sa mga suspek kay matud pa mao ra kini ang nasayod sa iyang itinerary ilabina kung mokuha na sa kuwarta alang sa sweldo sa mga empleyado.

Nagduda usab ang biktima nga ang ika-duhang suspek ang kanhi nila trabahante nga natangtang kay matud pa nasakpang nangawat og ligid ug gibaligya. Apan ang kapolisan nagpadayon pa sa pag-imbestigar sa mao’ng hitabo ug sa alegasyon sa biktima. – /GMR) (BANAT NEWS)