Numero sa lungon

CEBU, Philippines – Dunay panultihon nga dunay bwenas ug duna say malas. Sa uban ang mga butang nga nagsimbolo o may koneksyon sa mga patay giisip nila kini nga demalas, apan duna say mga nagtuo nga may dalang debuwenas ang patay kanila.

Sama ning usa ka drayber sa traysikol sa Sudtonggan Basak, Dakbayan sa Lapu-Lapu kinsa bag-ohay lang nakat-on pagpusta og swertres.

Ang 53-anyos nga amahan sa tulo ka mga bata miingon nga wala gayod sa iyang hunahuna nga mogawas ang numero nga iyang gipalit usa ka adlaw sa miaging    buwan.

Ang evening draw maoy iyang gipalitan og numero niadtong adlawa, numero nga wala na niya mahinumdomi.

Wala siya magdahom nga modaog tungod kay sa sulod sa usa ka tuig na niyang pagpunay og palit og numero sa suwertres wala pa man gayod siya makasulay og daog niini.

Matud pa niya nga sa sinugdanan dili gayod siya tigpalitan og numero sa suwertres kay gawas nga daginoton iyang kuwarta dili usab siya maantigo sa pagkumpiyot sa kombinasyon sa numero nga iyang paliton.

Nakat-on lang siya  sa pag-apil  og suwertres dihang iyang gikainom ang higalang drayber ‘sab sa traysikol nga nagbiyahe sa Barangay Poblacion ug Barangay Marigondon.

Matud pa niya gigalgal siya niini nga mobalik pagpalit og numero bisan og panagsa lang.

Giangkon niya nga nasina kaayo siya sa iyang higala kay makadaghan na man kini makadaog samtang siya, bisan sa rambolito na lang.

Usa ka adlaw sa miaging buwan, wala lamang damha nga giatake ang mao niyang amigo kay na high blood ug dead on arrival kini sa gidad-an niining tambalanan.

Miangkon siya nga naguol kaayo siya sa pagtaliwan sa iyang amigo nga maoy iyang suod sa tanan niyang kaubang drayber kay iya ra usab kini silingan.

Usa siya sa mga naghatud sa amigo sa paglubong niini, usa usab siya sa mga niaswat sa lungon dihang padung na kining ikarga sa purlon.

Apan sa ilang pag-aswat, nabantayan niya nga dihay tulo ka numero nga nakasulat sa ilawom sa lungon nga gisudlan sa iyang amigo. Nabutang sa iyang huna-huna ang pagpanggalgal kaniya sa amigo bahin sa pagtaya og numero.

Wala niya kalimti ang maong numero ug iyaha kining gipustahan nianang pagkagabii sa pamasin nga makadaog.

Mao na lay iyang kakurat nga ang migawas nga numero mao g’yud ang numero nga nakita niya sa ilawom sa lungon sa iyang amigo. – /EIM) (BANAT NEWS)