Babaye gigapos, gikawatan
CEBU, Philippines – Usa ka babaye ang gisulod sa kawatan sa iyang panimalay samtang natulog dayun gigapos ug gikawatan sa iyang mga gamit sa barangay Rizal, Pinamungajan kagahapon sa kadlawon.
Ang biktima naila nga si Catherine Concepcion, 32, minyo ug nagpuyo sa maong lugar.
Sa imbestigasyon nilang SPO2 Joey Macapobre ug kaubanan nasayran nga samtang natulog ang biktima, iya na lang nabantayan nga duna na’y laing tawo ang nakasulod sa iyang lawak.
Ang lalaki nailhan nga si Jimmy Paglinawan kinsa diha na sa iyang atubangan ug duna’y dala nga kutsilyo ug miingon nga “Ayaw pag siyagit kay patyon gyud tika.”
Dali nga giguyod ang babaye paingon sa pikas lawak ug gigapos ug gihipos sa suspek ang mga gamit sulod sa panimalay sama sa tablet nga Samsung, duha ka cellphone ug mga alahas. Human sa hitabo dali sab nga misibat ang suspek sakay sa motorsiklo nga narekober sa kapolisan 500 metros gikan sa panimalay ni Concepcion.
Nasayran nga sa likod sa balay miagi ang suspek human gitangtang ang duha ka jealousy blades sa bintana. Gipangita pa sa kapolisan ang suspek nga dali sab nahanaw sa maong lugar. – /GMR) (BANAT NEWS)
- Latest
