Tulo ka tawo naghikog
CEBU, Philippines - Tulo ka mga tawo ang nagkutlo sa ilang kaugalingong mga kinabuhi sa tulo ka managlahing mga insidente sa Cebu City ug Talisay City, usa kanila babaye.
Pasado alas-12 sa udto niadtong Huwebes, patay na nga nakita sa usa ka doktor ang iyang 18- anyos nga katabang babaye nga si Elvie Acedera sa likod sa ilang balay gamit ang hikot sa iro.
Si Acedera lumad nga taga Ma. Cristina, Balo-i, Lanao Del Norte ug nagtrabaho isip househelper sa balay ni Dr. Ramon Sucalit.
Matud pa ni PO3 Lou Pagara sa Homicide Section sa Cebu City Police Office nga nahinabi sa Banat News walay laing tawo nga nahibilin sa maong balay nianang tungora.
Samtang alas-10 sa gabii niana gihapong adlawa, usa ka Ramil Fernandez, 32, nagpuyo sa sitio Puso, Buhisan ang napalgang nagbitay ug may alambre sa liog nga gihikot sa sagunting sa ilang balay.
Nadiskubrehan kini sa ig-agaw ug dali pa untang gitabang apan patay na gyud kini. Nasuta nga nasagmuyo siya nga wala makatrabaho.
Samtang usa ka Jed Muana ang napalgan usab nga nagbitay na gikan sa punoan sa kahoy nga may electrical wire sa iyang liog diha sa Barangay Pook, Talisay City niadtong Huwebes sa buntag.
Ang inahan sa namatay nga si Eleuteria mitug-an nadunggan niya ang anak nga nag-away sa uyab niini nga taga Naga City nga mibisita kanila. Gituohang selos ang rason sa paghikog. (Jojo Ugdol ug Khacel Anne Sanchez/EIM)(BANAT NEWS)
- Latest
