Foot bridges sa mahiga gituki

CEBU, Philippines - Si Bise Mayor Edgardo Labella uban sa abogado ug engineers sa dakbayan sa Sugbo ang nakigkita sa mga opisyal sa dakbayan sa Mandaue kabahin sa problema sa Mahiga Creek. Matud ni Labella nga sa gipahigayon nilang ocular inspection, ilang nakita nga dili lang sa daplin sa Mahiga Creek ang giokupar kondili, naa na gyud mismo diha sa agianan sa tubig sa sapa ang ubang estraktura.

Gibutyag ni Labella nga diha dapit sa may Subangdaku ang mga poste sa estraktura naa na gipabarog sa sapa hinungdan nga naobserbahan nga inay padung sa dagat ang tubig, paatras na hinuon padung sa bukid.

Kini nga obserbasyon nagpakita lang nga kung dunay kusog nga uwan masanapan gyud sa tubig ang lugar duol sa sapa. Subay niini, si Mayor Michael Rama mimando sa pagpalarot sa 24 ka footbridges diha sa Mahiga Creek sa Subangdaku nga nagkonektar sa dakbayan sa Mandaue ug Sugbo.

Si Labella nagkanayon nga ang dakbayan sa Sugbo kinahanglang makigtambayayong sa dakbayan sa Mandaue sa pagsulbad sa problema sa baha.

Ang dakbayan sa Sugbo ug Mandaue kanunay’ng apektado sa baha kung mobunok ang kusog nga uwan.

Gikataho nga ang ubang mga footbridges sa maong sapa proyekto sa barangay.

 Subay usab niini, si city legal officer Jerone Castillo nagkanayon nga kinahanglang makig-coordinate sila sa dakbayan sa Mandaue tungod kay apektado usab kini kung laruton ang nahisgutang mga footbridge.

Dugang ni Castillo nga ilegal ang pagtukod sa mga estraktura diha sa Mahiga Creek. (BANAT NEWS)