Chief Inspector Cernio dako’g sala nga nahimo

CEBU, Philippines - Mas bug-at nga kaso ang ipasaka batok sa kanhi hepe sa Theft and Robbery Section (TRS) nga si Chief Inspector Noli Cernio tungod sa iyang paggamit-gamit sa personal sa sakyanan nga na-recover gikan sa mga suspetsado’ng kriminal.

Giusab sa Regional Investigation Detective and Management Division (RIDMD) sa Police Regional Office-7 ang resulta sa imbestigasyon nga gihimo sa Investigation and Detection Management Branch sa Cebu City Police Office.

Ang rekomendasyon sa IDMB nga managsama nga kaso’ng less misconduct ang ipasaka nila ni Cernio ug sa lain pa nga kanhi mga hepe sa TRS nga sila si Inspector William Alicaba ug Senior Inspector Elisandro Quijano.

Sila si Alicaba ug Quijano miangkon nga atol sa ilang pagka hepe sa TRS nakagamit usab sila sa Mitsubishi nga kotse nga sagad himuon nila nga service vehicle sa opisina.

Apan si Sr. Supt. Rey Lyndon Lawas nga maoy hepe sa RIDMD miingon nga natimbang-timbang nila nga mas dako ang salaod nga nahimo ni Cernio kay bisan og dili na siya hepe sa TRS wala niya iuli ang sakyanan. Ang sakyanan nga gibutangan pa og hinimo-himo nga plate numbers giuli lang ni Cernio diha nga ang isyu nabulgar na ngadto sa mga sakop sa media.

Gitataw ni Lawas nga girespetohan nila ang imbestigasyon sa IDMB apan katungod usab nila nga usbon ang rekomendasyon kun masuta nila nga dili kini tukma. Matud ni Lawas nga ang tukma’ng kaso nga ipasaka batok ni Cernio mao ang grave misconduct samtang less misconduct ang atubangon nila ni Quijano ug Alicaba. (BANAT NEWS)