Drugas, armas sakmit sa Lacion
CEBU, Philippines - Nadakpan ang lima ka gidudahang pusher og shabu sa pagpangronda sa kapolisan sa Purok Molave, Tayud, Consolacion diin nasakmit ang pinaketeng shabu ug armas de fuego.
Si PO2 Eric Pintoy sa Consolacion Police Station miila sa nadakpan nga sila si Marian Abao, 40 ug Arvin Casas, 29, nga pulos nagpuyo sa maong dapit; Van Palustratos, 38, taga Lamac, Consolacion; Israel Alvarez, 32, taga sitio Cogon, Catarman, Liloan; Senel Morato, 36, taga Centro, Tayud.
Parehong may search warrant, si Abao nasakmitan og usa ka dakung pakete sa shabu, 15 ka dagku-dagkung putos, 14 ka gagmay, tulo ka cellphones, P4,000 nga gituohang halin ug mga drug paraphernalia.
Samtang si Casas nasakmitan og kalibre .45 nga puno sa bala ug usa ka cellphone.
Ang ikatulong nadakpan nga si Palustratos nga naatlan sa pagpangronda ang nasakmitan og daku-daku nga putos sa shabu, si Alvarez ang nakuhaan usab og gamay nga pakete ug laing usa ka pakete ang nasakmit gikan kang Morato. Samtang nadakpan usab sa kapolisan si Ruel Davis Reyes, 34, nga taga Kalunasan, dakbayan sa Sugbo sa checkpoint nga gihimo sa Pitogo, Consolacion.
Si PO3 Arthur Ariate sa Consolacion Police Station miingon nga alas 10 ang takna sa gabii dihang nilabay si Reyes nga nagsakay og itom nga motorsiklo nga gitangtangan sa plate number.
Dihang ilang girikisa maoy ilang nasuta nga nagdala si Reyes og kalibre .45 nga may serial number nga NM10085, usa ka magazine nga adunay lima ka bala apan wala’y gipakitang lisensiya hinungdan nga ilang gisakmit ug gidakop. (BANAT NEWS)
- Latest
