Climate change gituki sa KBP Forum
CEBU, Philippines - Gituki sa usa ka forum sa pagsaulog sa Broadcaster’s Month sa Sugbo ang isyu kabahin sa Climate Change ug epekto sa El Niño.
Ang mga mamumulong gikan sa Philippine Atmospheric, Geophysical and Astronomical Services Administration (PAGASA), Department of Environment and Natural Resources (DENR), ug Metropolitan Cebu Water District (MCWD). Ang Weather Bureau chief sa PAGASA Mactan, Engr. Oscar Tabada, nipadayag nga kinahanglang magpakabana ang tanan sa kahimtang karon sa kalikupan pinaagi sa responsableng paghipos sa mga basura ug dili magpataka og putol sa mga kahoy.
Gipahibawo ni Tabada nga sa buwan sa Nobiyembre, Disyembre karong tuiga, ug Enero ug Pebrero sunod tuig masinati ang epekto sa El Niño. Hinuon gihulagway ni Tabada nga dili kini susama kainit sa nangaging mga buwan sa ting-init.
Ang kadagkoan sa MCWD mipasabot usab sa kasamtangan karon nga kahimtang sa suplay sa tubig sa Metro Cebu.
Ilang gipahibawo nga kun masinati na ang El Niño unang maapektohan ang surface water hinuon dili kaayo kini makaapekto sa ilang suplay sa tubig tungod sa gihimo nilang pagpangandam.
Samtang si Eddie Llamedo sa DENR-7 mibutyag usab sa mga pamaagi nga gihimo sa ilang ahensiya aron makatabang sa pagpugong sa nagkagrabeng epekto sa climate change. (BANAT NEWS)
- Latest