P450 mil gasto sa mass wedding

CEBU, Philippines - Mokabat sa P450 mil ang gahin sa kagamhanan sa dakbayan sa Sugbo sa gipahigayong mass wedding kagahapon.

Kini ang gibutyag ni Konsehal Mary Ann delos Santos, chairman sa Cebu City Women and Family Affairs Commission.

Ang reception gihimo sa Grand Convention Center. Mga edaran na ang lakip sa 64 ka paresan nga gikasal sa Cebu Metropolitan Cathedral.

Sila si Teresita Arnado dela Peña, 60, ug Candelario Gonzaga, 75, taga Basak ang 15 ka tuig na nga nagpuyo human nangamatay na ang tagsatagsa nila nga pares. Si Teresita dunay pito ka anak sa iyang unang bana samtang si Candelario dunay pito ka anak sa una niining asawa apan tungod kay mga edaran na wala na sila makaanak.

Ang duha nakahuna-huna sa pagpakasal aron mahatagan og bendisyon sa Ginoo ang ilang panagtipon.

Gibutyag ni Teresita nga usa siya ka sidewalk vendor  sa dalan Colon ug diha sila magkakita ug magkaila ni Candelario.

Si Candelario usa kini ka playing coach sa volleyball ug ang mga player niini anha mopalit og snacks ni Teresita.

Laing edaran na nga nalakip sa mass wedding mao sila si Tripona, 66, ug Guillermo Tan, 68, taga Kinasang-an.

Gibutyag sa duha nga gikasal lang sila sa huwis ug 40 ka tuig nga nagtipon.

Ang duha nagpakasal sa pari tungod kay si Guillermo buot nga magpasakop sa Knights of Columbus (KofC).

Ang reception sa bag-ong kasal didto kini sa Grand Convention Center sa Archbishop Avenue, dakbayan sa Sugbo.

Lakip sa gikasal kagahapon mao sila si Elmer Mansalay, 48, ug Susan Velayo, 45, taga San Jose, Talamban kinsa nagpuyo sulod sa unom ka tuig.

Matud ni Susan nga 11 ka buok ang mga dokumento nga gipangayo kanila isip mga rekisitos aron sila makasal.

Kini naglakip sa NSO, certificate of no marriage (CENOMAR), baptismal, confirmation ug barangay clearance ug uban pa. (BANAT NEWS)