Gi-gang rape

CEBU, Philippines - Usa ka 21- anyos nga babaye ang gilugos sa tulo ka mga tulisan atubangan sa iyang hinigugma, human nga sila gitulis diha sa Sitio Pajo, Barangay Pitalo, San Fernando niadtong nakalabay nga kaadlawon.

Ang biktima usa ka sales girl sa usa ka mall samtang ang iyang uyab nga 24-anyos ang silingan ra ‘sab niini.  Matud pa ni Police Officer One Fernando Mata sa San Fernando Police nga nahinabi sa Banat News nga gikan sa dakbayan sa Sugbo nanglaag ang manag-uyab ug kaadlawon nang nauli sa ilang lugar.

Sumala pa ni Mata nga mingaw ang lugar nga nahitaboan ug wala kaayo’y suga nga nakabutang.  Didto sa Pitalo Proper gikatahong giatangan sa tulo ka mga tulisan  ang duha ug gitulis.

Apan human matud pa nahatag sa mga biktima ang ilang mga butang, usa sa mga suspek ang mimando kanila nga mag “sex” sila sa ilang atubangan. Wala mosugot ang duha apan giingong nangasuko ang mga suspek ug silang tulo na hinuon maoy milugos sa dalaga.

Armado og kalibre 38 rebolber ang usa ug gitionan niini ang uyab nga lalaki samtang gibanos-banosan sa duha og lugos ang dalaga.

Sa follow up operation sa kapulisan, duha ka mga lalaki ang ilang gidakop nga naila nga sila si Kevin Cabrera, ug Arnel Ladica nga nagpuyo ra sab sa barangay Pitalo.

Ang duha ka mga suspek ang positibo gayud nga gitudlo sa lalaki nga maoy mihimo sa krimen.  Samtang ang usa pa nila ka kauban padayon pa nga gipangita sa kapulisan human nga nakasibat ug wala pa hinganli sa duha.

Apan bisan pa man sa maong panghitabo gitug-an ni Mata nga sumala pa wala’y plano ang lalaki nga biyaan ang iyang hinigugma.

Sumala pa nga misaad ang lalaki nga iya gihapong pakaslan ang iyang uyab bisan pa man sa nahitabo.

Nagduda si Mata nga posibleng sabog sa drugas ang mga suspek atol sa krimen. Gipaslak na sa Cebu Provincial Detention Rehabilitation Center (CPDRC) ang duha ka mga suspek nga nag-atubang og kasong robbery ug rape. (BANAT NEWS)