Mindanao rob gang nia sa Sugbo?

CEBU, Philippines – Gialerto karon ang kapulisan sa dakbayan sa Sugbo human nga usa ka pawnshop sa Koronadal, South Cotabato ang gisulod sa unom ka mga armadong tawo ug gitulis ug ang gidudahang mga tulisan mibiya na sa Mindanao.

Si Superintendent Romeo Santander, ang hepe sa City Intelligence Branch sa Cebu City Police Office nga nahinabi sa mga tigbalita mibutyag nga tungod sa nadawat nila nga impormasyon, ilaha karong gipahugtan ang surveillance sa mga lugar.

Gialerto na usab ang tanang station chiefs sa dakbayan sa Sugbo aron pag-monitor sa ilang mga hurisdiksyon ug pag-roving sa mga establisamento sa ilang dapit.

Ang maong impormasyon gikatakda usab nga ihatag ni Santander sa mga security agencies nga motambong sa ilang binuwan nga panagtigom  aron dili sila magkompiyansa.

Gibutyag ‘sab sa hepe sa CIB nga posibleng dako nga grupo ang mitira sa pawnshop sa siyudad sa Koronadal tungod kay giingong pulos high-powered nga mga armas ang dala sa mga tulisan ug duna pa’y silencer.

Tungod niini, gi- monitor na usab sa kapolisan ang mga tawong gidudahang local contacts sa grupo nga nagpuyo dinhi.

Si CCPO director, Senior Superintendent Noli Romana mipasalig nga kanunay andam ang kapolisan sa dakbayan batok sa mga krimen. -/EIM) (BANAT NEWS)