Pusher sa Liloan nasikop

CEBU, Philippines – Nadakpan sa buy- bust operation ang gikatahapang pusher og shabu uban sa duha ka lalaki sa sitio Tabok-Lamac, Yati, Liloan niadtong Domingo sa gabii.

Ang mga nadakpan mao si Ligaya Tulo Balorio, 51-anyos, Rey Ronald Tulo, 26, ug Jiffy Cabulo, 23, nga pulos ulitawo ug nagpuyo sa maog dapit.

Matud ni PO3 Jesson Gayo sa Liloan Police Station nga nakadawat na og mga taho ang ilang buhatan labot sa ilegal nga kalihukan ni Balorio hinungdan nga gihimo ang buy-bust operation nga gipangulohan sa ilang hepe nga si Senior Inspector Ramil Morpos.

Usa ka polis nga nagpatuong kustomer ang nipalit og usa ka paketeng shabu kang Balorio sa kantidad nga P200 hinungdan sa iyang pagkasikop lakip sa laing duha ka suspek.

Dugang nakuha gikan kang Balorio ang walo ka pakete samtang ang   duha nakuhaan og usa ka gamay’ng paketeng shabu ug mga drug paraphernalia. -/GMR) (BANAT NEWS)