Lalaki gipasirita’g gisilihan nga suka

CEBU, Philippines – Suka nga gisagulan og sili gihimong pangontra sa usa ka gwardiya batok sa lalaking  mikulata ug misuway og ilog sa armas sa silingan niyang gwardiya diha sa Salinas Drive, Lahug ning dakbayan, kagahapon sa buntag.

Way nahimo si Daniel Besande, 32, nagpuyo sa Barangay Lahug apan lumad nga taga Bislig, Surigao Del Sur nga nakatilaw og kulata sa duha ka guwardiya ug nakahilam-os sa suka nga gisagulan og sili kagahapon.

Base sa impormasyon nga nakuha sa Banat News sa usa sa mga gwardiya, giingong gikan nagduwa og computer game ang suspek sa maong lugar ug gikatahong dako kaayo kini og pildi.

Nakahukom na unta kini nga mouli apan usa ka gatos ka pesos na lang ang iyang kwarta hinungdan nga miduol kini sa cashier ug mihangyo nga mohulam og P400 apan kini gibalibaran.

Gumikan sa kalagot ni Besande gikatahong gisumbag niini ang gwardiya nga si Arnel Rosario, 31, sakop sa West Point Security Agency hinungdan nga nahitabo ang komosyon.

Ang cashier sa maong establisemento dali nga nangayo’g tabang sa guwardiya sa  silingan nga imnanan nga si Edward Sotto, nga sakop sa Infantry Security Agency.

Dali sab nga mitabang si Sotto ug mikuha sa iyang dala nga plastic sa alcohol nga duna’y sulod nga suka ug sili dayong gipasirit kini sa nawong sa suspek. Tungod niini, mitiyabaw sa kahalang ang suspek hangtod nga ila kini nga napugngan.

Ang mga personahi sa Mobile Patrol Group nga gipangulohan ni PO3 Alberto Diamante midala gilayon sa suspek sa Cebu City Medical Center (CCMC) human kini nakaangkon og mga bun-og sa kalawasan ug kahalang sa iyang nawong.

Gitug-an ‘sab sa guwardiya nga si Sotto nga iyang gituyo nga magdala og suka nga gisagulan og sili aron maoy gamiton batok sa kustomer nga magmaoy kun mahubog.

Gipaslak na sa Mabolo Police detention cell si Besande nga gikatakdang pasakaan og kaso. -/EIM) (BANAT NEWS)