Kaso sa tipdas sa Rehiyon 7 nisaka
CEBU, Philippines – Nisaka ang kaso sa tipdas sa Central Visayas itandi sa niaging tuig sumala pa sa Department of Health (DOH-7).
Nasayran ang siyudad sa Sugbo ang may labing daghang kaso sa tipdas hinuon ang DOH-7 wala una mipagawas og datos kun pila ang pagsaka sa kaso.
Matud ni Dr. Jaime Bernadas, Regional Director sa DOH-7, aron masolusyonan ang maong problema, gihingusgan karong buwana ang mass immunization campaign.
Ang DOH-7 mihingusog sa ilang pagpamakuna kontra tipdas ngadto sa mga bata aron dili dali mataptan sa maong sakit.
Nasayran nga 95 porsiyento ang target sa DOH-7 sa mga tawo nga ilang mabakunahan apan giangkon ni Bernadas nga sulod sa tulo ka tuig wala nila kini makuha.
Usa sa gihatag nga hinungdan kun nganong wala makab-ot ang maong target ang kakuwang sa information drive ngadto sa katawhan. -/GMR) (BANAT NEWS)
- Latest