Lolo gipusil gitiwasan patay

CEBU, Philippines – Patay ang usa ka lalaki nga giingong giatangan ug gipusil sa iyang silingan samtang padulong kini nga mouli gikan nag-inom sa balay sa iyang silingan pasado alas 10:00 sa miaging gabii sa Barangay Tunod sa lungsod sa Pinamungajan.

Ang biktima naila nga si Teofilo Paculto, 68, molupyo sa nahisgutan nga lugar samtang ang suspek giila sa kapolisan nga si Mateo Sasutana, silingan sa biktima nga usa ka construction worker.

Si PO2 Ariel Tajab, desk officer sa Pinamungajan Police Station nga nahinabi sa Banat News miingon nga ang biktima didto sa balay sa iyang amigo nga si Leonardo Baron ug nag-inom og tuba ug sa pagka alas 10:00 sa gabii nakahukom kining biktima nga mouli. Kuyog nga miuli sa biktima ang usa ka 11-anyos nga bata  dihang nakadungog sila og buto hinungdan nga nagdinaganay ang duha.

Nakatago sa  anahaw ang bata apan nadagma ang biktima ug naapsan sa suspek ug diretsong mipusil sa ulo niini hinungdan sa iyang kamatayon.

Pasado alas-4 na sa kaadlawon naabot sa kapolisan ang maong hitabo tungod kay bukid na man kaayo kini ug layo sa sentro.

Padayon pa ang imbestigasyon sa kapolisan sa maong hitabo ug gipangita pa nila ang suspek nga matud pa misibat human mapatay ang biktima. -/EIM) (BANAT NEWS)