Press Freedom Week 2014 gisaulog
CEBU, Philippines – Gihiklin una ang kompetisyon sa mga sakop sa media sa Sugbo aron pagsaulog sa ika-20 ka tuig nga Press Freedom Week nga gibuksan kagahapon.
Ang kalihukan gisugdan sa parada pasado alas 7:00 sa buntag gikan sa Fuente Osmeña Circle padulong sa University of San Carlos (South) Performing Arts Theater.
Miapil sa maong kalihukan ang nagkalainlaing media personalities sa Sugbo nga naglangkub sa mga pamantalaan ug sa Kapisanan ng mga Broadkaster sa Pilipinas (KBP) Cebu.
Mga nagkadaiyang newspapers, radio ug television stations ang misalmot sa parada.
Lakip nga giparada ang nakoronahan nga Miss Press Freedom 2014 nga si Jean Marvette Demecillo sa The Freeman ug Banat News.
Human sa parada, gipahigayon ang Santos nga Misa nga gihalad ni Fr. Jonas Mejares, rector sa Basilica Minore del Sto Niño de Cebu.
Sa wala pa magsugod og wali si Fr. Mejares, mihangyo siya sa mga sakop sa media nga mohatag sa ilang pahiyum ug pagsulti og “I love you” sa tawo nga naglingkod sa ilang tupad.
Matud ni Mejares sa iyang wali nga kinahanglan nga buhaton sa mga sakop sa media ang mga buluhaton niini.
“Let us become what we ought to be, you should become what you ought to be,” dugang ni Mejares.
Dason niya nga kinahanglan nga motrabaho ang mga sakop sa media alang sa kahimayaan sa Ginoo ug dili lang sa sweldo kay gikinahanglan kini sa simbahan.
Isip panapos sa iyang wali iyang gihangyo ang mga sakop sa media nga mag-inunongay ug bansayon ang iyang kagawasan.
Human sa misa may usa ka mubo nga programa ang gipahigayon diin mipasundayag sa ilang mga talento sa entablado ang mga sakop sa media. -/GMR) (BANAT NEWS)
- Latest
