Lima ka pushers sa Mandaue sikop
CEBU, Philippines – Nadakpan ang lima ka gikatahapang pusher og shabu sa managlahing operasyon sa kapolisan sa Mandaue City Police Office (MCPO) sayo kagahapon sa buntag diin nasakmit ang mga pinaketeng shabu, armas ug mga drug paraphernalia.
Sa Eusebio Compound sa barangay Subangdaku, unang nadakpan si Robert Jesson Ocba, 27-anyos, ulitawo ug nasakmit gikan niini ang unom ka paketeng shabu, 17 ka tinfoil ug uban pa’ng drug paraphernalia.
Si Senior Inspector Miguel Andesa, hepe sa Presinto 2 sa MCPO, maoy nangulo sa buy-bust operation nga niresulta sa pagkasikop ni Ocba.
Ang ikaduhang nadakpan mao si Nilo Marababol, 46-anyos, minyo nga nagpuyo sa sitio San Miguel, barangay Guizo diin nasakmit ang tulo ka dagku-dagkung pakete sa shabu, 24 ka gagmay’ng pakete, lima ka lighter, tulo ka cellphone ug mga drug paraphernalia. Ang hepe sa Presinto 1 sa MCPO, Chief Inspector Jimmy Aguisanda, ang nangulo sa pagronda sa panimalay ni Marababol pinasikad sa search warrant nga giluwatan ni Judge Teresita Galanida.
Dugang nadakpan mao ang tulo ka suspetsadong pusher og shabu sa duha ka panimalay sa sitio Little Tokyo, barangay Maguikay nga gidungan sa pagronda sa kapolisan sa Presinto 4 sa MCPO nga gipangulohan sa hepe nga si Senior Inspector Philip Silva. Ang mga nadakpan mao sila Leo Capuyan, 50-anyos, kinsa nasakmitan og kalibre .38 nga armas nga adunay duha ka bala, usa ka daku-dakung pakete nga shabu, napulo ka mga dagom ug mga drug paraphernalia.
Sa laing panimalay nga nahimutang gihapon sa maong dapit nga gironda nilang Inspector Rey delos Santos ug kaubanan maoy nadakpan sila si Epefanio Capuyan, 25, ug Edizon Capuyan, 35.
Nunot sa pagkasikop sa duha ka suspek maoy ilang nasakmit ang usa ka daku-dakung paketeng shabu ug mga drug paraphernalia. -/GMR) (BANAT NEWS)
- Latest
