Upat ka motor gidaro sa truck, usa patay

CEBU, Philippines - Usa ang namatay ug duha ang grabeng naangol dihang kalit nawad-an og brake sa dulhogon nga bahin sa karsada sa Poblacion Oriental, lungsod sa Consolacion ang delivery truck sa ready mix  concrete.

Ang insidente nahitabo alas 7 pasado sa gabii niadtong Biyernes nga nakaingon usab sa grabeng trapiko sa maong lugar nga  nilungtad hangtud alas 11 sa gabii.

Ang namatay mao si Ruben Prejo Boton, 30, minyo nga taga Poblacion, lungsod sa Sogod ug naangol usab ang drayber sa ready mix concrete truck nga si Abelardo Galupe, 36, minyo nga lumad nga taga Valenzuela, Metro Manila ug kasamtangang nagpuyo sa Cogon, Tuburan, Cebu.

Ang ikaduhang naangol mao ang habal-habal drayber nga si Edgar Herbito, 42, taga Tulo-Tulo, Consolacion nga gidaro sa nahaybol nga delivery truck.

Laing gidaro ang upat pa ka motorsiklo nga gi-parking daplin sa karsada

Si SPO2 Alvin Abay-abay sa Consolacion Police Station nga nahinabi sa Banat News miingon nga gikan pa nag-deliver og ready mix nga semento ang maong sakyanan sa Sta. Lucia Subdivision.

Ang delivery truck padulong  na unta gawas sa national highway sa Poblacion Oriental sa maong lungsod  apan paghidangat sa dulhogon nga bahin kalit lang naharos ang brake ug si Galupe naglisud na sa pagkontrolar sa sakyanan.

Si Boton nga maoy mixer operator nga kauban ni Galupe ang nilayat hinungdan nga naligsan.

Si Abay-abay miingon nga human sa pagligis kang Boton milahos ang sakyanan paingon sa ubos sa national road ug gidaro ang gi-parking nga upat ka motorsiklo.

Ang tulo ka biktima daling gihatud sa Eversely Child  Sanitarium General Hospital sa Jagobiao, dakbayan sa Mandaue apan si Boton ang gideklarar nga dead on arrival.

Sila si Galupe ug Herbito gibalhin sa Vicente Sotto Memorial Medical Center sa dakbayan sa Sugbo. (BANAT NEWS)