Call center agent, lalaki nadasmagan patay

CEBU, Philippines - Patay ang usa ka call center agent human na-hit and run sa usa ka kotse alas 11 sa gabii niadtong Huwebes sa may Banilad, Cebu City.

Ang biktima naila nga si Marjun Duran, kasamtangang nagpuyo sa Alicia Tower apan lumad nga taga Bacolod City ug gikatahong kaniadto lang Septiyembre 8  nagsugod og trabaho isip call center agent.

Matud ni Joy Tumulak, operations chief sa City Traffic Operations Management (CITOM), nga usa ka pula nga sedan nga kotse ang nakabangga sa biktima base sa nakuha sa close circuit television (CCTV) camera.

Apan gipasabot ni Tumulak nga dili maklaro ang plate number sa sakyanan gumikan sa kahanap sa kopya sa video.

Base sa video footage, ang biktima gikan sa pikas daplin sa karsada ug mitungtong sa tiilan sa flyover sa maong lugar apan sa pagtabok niini wala niya nabantayi ang kusog nga kotse nga gikan sa Talamban.

Sumala pa ni Tumulak nga halos 16 ka metros ang gilabayan sa biktima.

Gipanawagan ni Tumulak ang publiko nga kung makabantay og pula nga sedan nga naguba ang “hood” sa sakyanan nga mo-report sa labing duol nga buhatan sa kapolisan.

Samtang patay usab ang motorista nga nadasmagan sa gikasugat nga cargo truck sa Dunggoan, Danao City alas 8 pasado sa gabii sa samang adlaw.

Si SPO1 Romil Costal, traffic field investigator sa Danao Police Station, miila sa biktima nga si Junrey Manulat, 19, taga Sandayong Norte sa maong dakbayan.

Matud ni Costal nga nagsakay sa motorsiklo ang biktima padulong sa ilang panimalay ug ang cargo truck nga gimaneho ni Renato Ursal nga taga Poblacion, San Remigio gikan sa dakbayan sa Sugbo padulong sa lungsod sa Daanbantayan.

Paghidangat sa maong lugar, ang cargo truck mi-overtake sa gisundan nga laing sakyanan hinungdan sa pagkasungag sa motorsiklo nga gidala sa biktima. (Jojo C. Ugdol ug Romeo T. Limpangog/GMR)(BANAT NEWS)