Toledo City Treasurer giparelibohan
CEBU, Philippines - Giparelibohan ni Toledo City Mayor John Henry Sonny Osmeña sa pwesto isip city treasurer si Ofelia Oliva sugod niadtong adlaw’ng Huwebes.
Kini ang gibutyag sa mayor sa mga sakop sa media atol sa pakighinabi niini kagahapon dungan sa gipahigayong switch-on ceremony sa Toledo Power Corporation.
Matud ni Osmeña nga nipadala na kini og suwat sa buhatan sa Bureau of Local Government Region-7 Department of Finance pag-awhag nga ilisan sa katungdanan si Oliva isip city treasurer sa Toledo.
Kahinumduman nga dul-an duha na ka semana ang nakalabay sa nahitabo nga pagpanglungkab sa treasurer’s office sa Toledo.
Apan giklaro sa mayor nga walay kalabotan sa nahitabong paglungkab ang pagpapha kang Oliva sa pwesto.
Dihang gipugos kini sa pagpangutana sa mga sakop sa media sa hinungdan kun nganong iyang parelibohan si Oliva, ang mayor miingon: "I told her that there's only one mayor in Toledo," matud ni Osmeña. Gibutyag usab ni Osmeña nga dili pirme igkita si Oliva sa iyang buhatan sa dihang naglingkod pa kini sa maong katungdanan.
Ang Banat News misuway pagtawag sa telepono ni Oliva aron makuhaan og pamahayag bahin sa pagrelibo kaniya apan dili kini motubag sa tawag. (Raymond Abarcas/EIM)(BANAT NEWS)
- Latest
