SSS-Mandaue gilungkab ‘sab

CEBU, Philippines - Nahanaw ang mga mahalong butang sa Social Security System (SSS) Mandaue City Branch nga naa nahimutang sa dalan A. Del Rosario, Barangay Guizo, Dakbayan sa Mandaue.

Si PO2 Eleazar Ramil, imbestigador sa Investigation Detection and Management Bureau  (IDMB) miingon nga sa pakisusi nga ilang gihimo ilang nasuta nga ang nahanaw mao ang usa ka Lenovo Netbook nga P25 mil ang kantidad ug tulo ka Asus Netbook nga  P23 mil ang kantidad matag usa niini.

Matud pa ni Ramil nga nakasulod ang mga kawatan pinaagi sa pagligwat sa door knob sa pultahan sa maong buhatan.

Walay Close Circuit Television (CCTV) camera ang maong buhatan hinungdan nga walay matan-aw nga footage alang unta sa pag-ila sa mga responsable.

Si Merlinda Duazo nga maoy branch manager sa nahisgotang buhatan nga nahinabi sa mga tigbalita miingon nga walay sulod nga kuwarta ang ilang mga cabinet sanglit ang mga miyembro sa SSS adto man mobayad sa bangko ug ang mga resibo lamang ang ilang gidawat.

Ang building guard nga si  Emilyn Perez nga nahinabi sa Banat News miingon nga magsugod siya sa iyang duty alas-7 ang takna sa gabii ug alas- 4 ang takna sa kaadlawon ang katapusan niyang pag-roving niini.

(Romeo T. Limpangog ug Decemay Padilla/EIM)(BANAT NEWS)