Programa sa IEC 2016 makita sa CCTN

CEBU, Philippines - Nag-umol karon ang CCTN Channel 47 ug ang Archdiocese of Cebu og programa sa pagpasabot sa katawhan labot sa International Eucharistic Congress (IEC) nga ipahigayon sa Sugbo karong 2016.

Ang maong programa dumalahon  sa bag-ong natudlo nga media liaison officer sa Archdiocese of Cebu, Msgr. Joseph Tan ug sa Oasis of Love head servant, Nonito “Tatay Dodong” Limchua.

Ang maong programa maoy mahimong hinagiban aron mas masabtan pa sa katawhan ang kamahinungdanon sa umaabot nga dakung kalihukan sa simbahan.

Sa maong programa makita sa katawhan pinaagi sa CCTN-47 ang mga kalamboan ug kalihukan sa gihimong pagpangandam sa IEC, labi na sa nagkalain-laing working committees.

Gawas niini, gipasabot ni Tan nga lakip sa ipakita sa programa ang nagkalain-laing sugilanon sa mga tawo kansang kinabuhi gitandog pinaagi sa eyukaristiya.

Makita usab sa maong programa ang kinabuhi sa mga Santos nga nakadawat sa grasya sa Ginoo pinaagi sa Holy Eucharist.

Plano nga ilusad ang maong programa atol sa Feast of Christ the King karong Nobiyembre.

Subay niini giawhag ni Tan ang katawhan nga mas hugtan pa ang pag-ampo alang sa kalampusan sa maong programa ug sa mga pagpangandam alang sa umaabot nga International Eucharistic Congress.  (BANAT NEWS)