Libreng sakay sa minglanilla
CEBU, Philippines - Adunay libreng sakay alang sa mga mangomprahay sa bag-ong merkado publiko sa lungsod sa Minglanilla.
Matud ni Municipal Administrator Concordio Mejias nga gipatuman nila sukad niadtong Sabado ang libreng sakay.
Hinuon matag Sabado ug Domingo ra kini ipatuman diin daghan ang mga tawo nga mangompra.
Ang libreng sakay gipatuman nunot usab sa pagtugot sa kagamhanan sa lungsod nga pabalikon sa bag-ong merkado kadtong mga manindahay nga una’ng nagdumili pagbalhin.
Sukad nitumaw ang kagubot sa pagpapahawa sa mga manindahay gikan sa karaang merkado, wala na sila makapanginabuhi human wala una sila patindaha sa bag-ong merkado.
Apan dihang nidangop sa Commission on Human Rights-7 ang mga apektadong manindahay, ang maong ahensiya na ang nihangyo sa kagamhanan sa lungsod nga ikonsiderar ang kahimtang sa mga manindahay ug hatagan sila og higayun nga makapaninda og balik sa bag-ong merkado.
Si Mayor Elanito Peña nihulagway nga wala na sila’y nasugatan nga problema karon sa pagpadagan sa bag-ong merkado.
Apan padayong gitun-an sa legal office ang pagpasaka sa tukmang reklamo batok sa mga manindahay nga nisupak dihang gipapahawa sila sa karaang merkado. (BANAT NEWS)
- Latest
