12 Ka tawo sikop, P400mil drugas ‘sakmit

CEBU, Philippines - Dose ka mga tawo ang nadakpan sa managlahing anti-illegal drugs operations sa kapolisan sa Metro Cebu sa miaging gabii nga miresulta sa pagkasakmit sa dul-an P400 mil nga kantidad sa shabu.

Sa  Lapu-Lapu City, lima ka mga suspetsado ang gidakop sulod sa duha ka adlaw nga buy-bust operation sa Cebu Anti-illegal Drug Special Operations Task Group tulo kanila nakuhaan og gibanabanang P300 mil nga shabu diha sa Sitio Kawayan, Barangay Gun-ob. Ang nadakpan kagahapon sa kaadlawon sa grupo ni Inspector Judith Besas mao sila si Gerrod Albarracin, 32, kinsa nakuhaan og 16 ka gagmay’ng pakete sa shabu samtang si Juanita Sadili, 39, nakuhaan og unom ka mga medium size nga pakete sa ginadiling drugas ug si Joegen Apa, 19, usa ka gamay’ng pakete sa drugas. Nakuhaan usab sila og drug paraphernalia.

Sa miaging Martes sa gabii, nadakpan usab si Rey Malingin, 42, residente sa Sitio Mahayahay, Barangay Bankal human nakuhaan og upat ka gagmay’ng pakete sa ginadiling drugas  ug drug paraphernalia ingon man ang marked money sa operasyon.  Nadakpan usab sa Sitio Sacred Heart, Barangay Gun-ob si Neil Montebon, 36, nga nakuhaan og usa ka gamay ug medium size nga paketeng shabu.

Samtang sa dakbayan sa Mandaue, nadakpan sa  Barangay Subangdaku ang usa ka barangay tanod sa Cambaro nga si Gabriel Cinco Baguio, 37, ug higala nga si Paulino Casas Pillar nga traysikad drayber nga taga Barangay Umapad.

Ang duha gidakop sa grupo ni Inspector Ricky Calong atol sa police checkpoint diha sa Barangay Subangdaku human nga nasakpan si Pillar nga nagdala og usa ka dakong pakete nga may sud nga shabu. Laing nadakpan sa usa usab ka buy-bust operation sa lungsod sa Liloan mao si Jervin Tagalog Icot, 21, kinsa nakuhaan og unom ka paketeng shabu  diha sa Barangay Yati.

Samtang sa dakbayan sa Sugbo, usa ka Lowella dela Cruz Beldad alyas Lotlot, 37, taga Purok 3, Camputhaw, Cebu City ang gidakop human dunay nakuhang 59 ka paketeng shabu sa ilang balay ang mga sakop sa City Intelligence Branch. Matud pa nga target unta sa CIB ang kapuyo niini nga naila lang sa pangalang Erwin, apan giingong nakaikyas kini agi sa sekretong pultahan sa luyo sa ilang balay. Nakuhaan usab kini og P2,500 nga gituohang halin sa drugas.

Samtang sa Argao, nadakpan ang tulo ka tawo atol sa buy-bust operation sa Poblacion nga miresulta sa pagkasakmit sa katorse ka paketeng shabu.

Ang nadakpan mao sila si Ace Aguilar ug kapuyo niining si Leona Llanos, ug ang igsuon ni Aquilar nga si Arnel kinsa dunay warrant of arrest sa kaso gihapon sa pagpamaligya og shabu.  (BANAT NEWS)