Manager naghikog tungod sa problema
CEBU, Philippines - Patay ang manager sa taxi company human nga nagpusil sa iyang ulo sulod sa lawak sa ilang panimalay kagahapon sa buntag sa Barangay Tingob, dakbayan sa Mandaue. Si SPO3 Renato Canja sa kapolisan sa Presinto 4 sa Mandaue City Police Office (MCPO) miila sa namatay nga si Albert Angeles, 49, manager sa VNM taxi nga nagbase sa maong dakbayan.
Matud pa ni Canja nga ang asawa niini naigking sa buto sa armas gikan sa ilang lawak samtang kini nagdegamo sa kusina. Sa iyang pagsusi sa lawak, nakita niya ang bana nga nagbuy-od na ug may samad sa ulo ug patay na.
Nakuha sa crime scene ang usa ka kalibre 45 nga pistola nga may usa ka magazine ug suicide note nga nangayo og pasaylo sa mga anak nga nag-ingon: “Sorry, mga anak, dili na makaya ni Papa ang problema.”
Si Canja miingon nga ang asawa sa namatay wa masayod kun unsay problema sa iyang bana gumikan kay wala kini mosugilon kaniya.
Samtang usa ka 14-anyos nga 3rd year high school nga lalaki ang naghikog sulod sa ilang balay, Martes sa alas 7:40 sa gabii sa Malbaga, Daanbantayan human giingong gikasab-an sa inahan niini. Sumala pa sa kapolisan nga ang inahan mitug-an kanila nga iyang namaymayan ang anak apan wa sila magdahom nga buhaton kadto sa anak. Nakit-an niya kini nga nagbitay na sa lawak ug may pisi sa liog, wala na kini matabang pa sa Daanbantayan Hospital. (BANAT NEWS)
- Latest
