Wanted naaksidente, naangol

CEBU, Philippines – Sikop ang usa ka lalaki nga wanted human naaksidente ang giluwanang motorsiklo sa Poblacion, lungsod sa Compostela niadtong Lunes sa gabii.

Ang akusado nga si Jeffrey Jagdon, alyas Jeffrey Villarin Sabate, 29-anyos nga taga Guinsay, dakbayan sa Danao may dala pa’ng shoulder bag gikan gilabni sa usa ka babaye dihang na-aksidente.

Si Jagdon giingong suspek sa pagpanglugos sa barangay Tisa, dakbayan sa Sugbo ug wanted sa kasong robbery sa lungod sa Catmon.

Si SPO2 Ramir Maglasang, traffic chief investigator sa Compostela Police Station, miingon nga gikan sa dakbayan sa Sugbo ang suspek kauban ang laing lalaki nga giila lang sa angga nga Walwal.

Matud ni Maglasang nga dihang nahidangat sa lungsod sa Compostela, kalit lang gikasungag ang motorsiklo nga gimaneho ni Markfil Estralla, 20, taga Poblacion sa maong lungsod samtang angkas usab ang hinigugma nga si Rhea Jugar, 20, taga Tayud, Consolacion.

Dugang ni Maglasang nga naglisud pagbangon ang suspek gumikan sa pagkaangol apan ang kuyog nga si Walwal ang daling nakabarug dala ang helmet ug nagdali sa pagsibat pahilayo sa maong dapit. Si Estralla ug Jugar nga nakabaton usab og kadaut sa ilang kalawasan ang daling gihatud sa tambalanan.

Matud ni Maglasang  nga ang shoulder bag adunay sulod nga uniporme sa trabahante sa Jollibee, ID ug cellphone nga maoy hinungdan nga ilang gitawagan ug nasuta nga ang tag-iya biktima diay sa pagpanglabni.

Si PO3 Robert de Castro sa Presinto 10 sa Cebu City Police Office (CCPO) miila sa tag-iya sa shoulder bag nga si Caroline Angana, 20, dalaga nga taga Tisa, dakbayan sa Sugbo.

Si Jagdon positibong giila ni Angana nga maoy naglabni sa iyang shoulder bag. Gitug-an ni de Castro nga si Jagdon gireklamo og pagpanglugos sa usa ka minor de edad.

Si PO2 Bernard Ares sa Catmon Police Station mikompirmar usab nga si Jagdon dugay na nilang gipangita sa kasong robbery. -/GMR) (BANAT NEWS)