Nabanggaan og motorsiklo patay

CEBU, Philippines – Gumikan sa grabeng naangkon nga bali ug bun-og sa kalawasan, nakabsan gyud sa kinabuhi sulod sa tambalanan ang usa ka lalaki kinsa nabanggaan sa usa ka motorsiklo sa Cogon West, lungsod sa Carmen. Ang biktima naila nga si Vicente Lopez, hingkod, taga Luyang sa maong lungsod samtang ang nagmaneho sa motorsiklo mao si Emgie Dullantes, 23, taga Basak, dakbayan Mandaue.

Sa imbestigasyon sa kapolisan nasayran nga samtang sakay sa motorsiklo si Dullantes paingon sa amihanang bahin sa Sugbo, kalit lang mitabok sa karsada si Lopez ug maayong pagkasabak sa motorsiklo.

Gumikan sa kakusog sa pagkabangga, maayong pagkalukot ni Lopez sa karsada samtang nakaangkon og mga pangos ug bun-og sa lawas ang drayber human usab kini misukarap sa karsada.  Dali pa unta nga gidala sa Cebu Provincial Hospital sa dakbayan sa Danao ang biktima ug gibalhin sa Vicente Sotto Memorial Medical Center (VSMMC) apan nakabsan gyud sa iyang kinabuhi.

Giingong nagkasinabot ra ang pamilya sa biktima ug ang pamilya sa drayber sa motorsiklo nga dili na lang mopasaka og kaso ug himoon na lang ang pag-areglo -/GMR) (BANAT NEWS)