Alimaong patay sa SWAT

CEBU, Philippines – Patay ang usa ka sakop sa grupong Alimaong nga misukol sa mga sakop sa Special Weapons and Tactics (SWAT) sa Cebu City Police Office, human nga miresponde ang mga operatiba sa usa ka alarma nga ilang nadawat ma’y labot sa mga armadong tawo nga nasigpatan sa Sitio Lupon, Barangay Agsungot, Cebu City, niadtong Domingo sa gabii.

Ang napusilan patay naila nga si Rodelio Estores, 50, nagpuyo sa Sitio Kabungahan, Busay, Cebu City.

Pag-abot sa mga sakop sa SWAT sa maong lugar, ilang gisubay ang lugar kuyog ang kapitan sa barangay ug mga tanod. Usa ka balay ang gisubay sa mga operatiba apan walay nakita nga tawo sa sulod nga bahin, apan sa ilang pagpadayon ilang nakita ang usa ka MK II fragmentation grenade.

Paingon na unta sila mopauli dihang kalit mibutho si Estores sa kilid sa dalan ug gipusil sa dughan ang usa sa mga sakop sa SWAT nga si SPO2 Renante Nioda, swerteng nakasuot kini og bulletproof vest, apan mitalipsay ang bala sa nawong sa maong pulis.

Dali ‘sab gilayon nga mibalos ang mga SWAT  nga miresulta sa kamatayon ni Estores. Nakuha sa mga operatiba gikan sa crime scene ang usa ka .357 revolver, lain pa nga granada, tulo ka bala sa .38, duha ka basiyo, ug usa ka ID card sa Lumad Alimaong gikan sa namatay.

Usa ka nagpailang Grand Chief sa Alimaong nga si Ha Datu Bontito Leon Kilat o Vicente Gonzalez Jr., mibisita sa Cebu City Police Office aron subayon kung unsa ang hinungdan sa pagkamatay sa iyang sakop.

Hinuon gipasabot ni Gonzalez nga ang tumong lang nila ang pagsubay kung unsa ang nahitabo ug wala pa sila’y plano kun mopasaka ba sila og reklamo. Apan ang hepe sa SWAT nga si Superintendent Arnel Banzon mipasabot nga lehitimo nga operasyon ang ilang gihimo  tungod kay may nadawat silang alarma bahin sa armadong mga tawo.

Ikaduha, sila usab maoy giunhan pagpusil ug katungod sa mga polis nga depensahan ilang mga kaugalingon. -/EIM) (BANAT NEWS)