Nangawat og kable sa telepono nadakpan

CEBU, Philippines – Wala’y swerte ang usa ka lalaki human kini nasikop human nga naaktohan sa kapulisan sa lungsod sa Dalaguete nga namutol og cable wire sa usa ka telecom company  diha sa National Highway sa Casay, Dalaguete   Sabado sa gabii.

Ang dinakpan naila nga si Crescielo Tonggoy, 32, residente sa Lahug , sa dakbayan sa Sugbo.

Matud pa ni PO2 Godofredo Glipa sa Dalaguete Police nga nahinabi sa Banat News kini nagkanayon nga gikan sa barangay Tuba ang iyang mga kauban gipangulohan sa hepe nga si Sr.Insp. Joseph Berondo aron unta mo-serve og warrant of arrest, apan ilang naagian si Tonggoy nga namutol og cable sa telepono hinungdan nga gisita kini.

Sa dihang nakabantay si Tonggoy sa mga polis dali sab gilayon kini nga midagan ug dayon sakay sa iyang dala nga multicab apan napugngan siya sa kapulisan.

Sumala pa nga gawas ni Tonggoy duna pa’y laing upat ka mga kauban ang suspek nga maoy tigkuha og mga cable wire sa maong lugar.

Sa imbestigasyon sa kapulisan nasayran nga usa ka Ralph Inso, silingan ra ‘sab sa dinakpan ang ilang gipangita human nga dali kining nakasibat.

Nakuha sa mga polis gikan sa multicab ni Tonggoy ang 81 ka metros sa cable wire sa usa ka telecom company ug usa ka tool box nga duna’y sulod nga mga gamit.

Gitanggong na sa Dalaguete Police detention cell ang dinakpan nga mag-atubang og tukmang kaso. -/EIM) (BANAT NEWS)