Upat ka ‘pushers’ gidakop sa Kamputhaw

CEBU, Philippines – Gidakop sa City Intelligence Branch (CIB) ang upat ka tawo atol sa duha ka managlahing operasyon batok sa ilegal nga drugas niadtong Sabado sa barangay Kamputhaw, dakbayan sa Sugbo.

Pasado alas 12 sa udto niadtong Sabado, ang CIB nga gipangulohan ni SPO2 Gerald Abatayo ang misikop sa usa ka lalaki sa Purok 3 ug nakuhaan og daghang linikit nga marijuana.

Usa ka “intensified police operation” ang gihimo sa kapolisan sa maong lugar nga misangpot sa pagkasikop ni Renato Durens, alyas Bulljack, 18, ulitawo.

Nakuha sa kapolisan gikan sa posesyon sa dinakpan ang 36 ka linukot nga marijuana.

Gitanggong na sa Cebu City Police Office (CCPO) detention cell ang dinakpan ug gikatakdang pasakaan og kaso sa drugas.

Samtang buntag sa maong adlaw usa usab ka operasyon ang gihimo sa taga CIB sa sudlonon nga bahin duol sa pribadong tambalanan sa Kamputhaw nga miresulta sa pagkasikop sa tulo ka tawo.

Unang nasikop sa kapolisan sila si Jose Sistoso Sun, alyas Rodney, 37, ug ang live-in partner nga si Annabelle Resonable, 42, nga parehos nagpuyo sa maong lugar.

Nakuhaan og usa ka taas nga gamay nga rectangular size nga drugas si Rodney samtang tulo usab ka gagmay nga pakete sa gituohang drugas ang nakuha gikan ni Resonable ug P2,000 nga gituohang halin sa ilegal nga drugas sa mga dinakpan.

Human nasikop ang mag live-in partner, mitug-an kini nga gikan sa Purok 3 sa maong barangay ang drugas nga ilang gibaligya hinungdan nga dali sab nga mihimo og follow-up operation ang taga CIB sa maong lugar ug gipangita ang usa ka alyas “Ocol” nga mao’y gitudlo sa unang nadakpan.

Apan atol sa pagsubay sa taga CIB sa maong lugar, usa ka Julius Cebes, 38, ulitawo ang miduol hinuon sa polis decoy sa taga CIB ug apil sa gisikop human nga nakuhaan og usa ka gamay nga pakete sa drugas.

Gipangpaslak na sa Cebu City Police Office (CCPO) detention cell ang mga dinakpan nga mag-atubang og tukmang kaso. -/GMR) (BANAT NEWS)