Early warning device

CEBU, Philippines – Hapit tanan nga mga motorista wala gayud motuman sa lagda nga kinahanglan sila nga magdala-dala og Early Warning Device (EWD) diha sa ilang mga sakyanan.

Ang kagamitan niini mao nga kon maabereya ang sakyanan, gamiton nila ang Early Warning Device nga ibutang labing minus duha ka metro sa likod nga bahin sa nadaut nga sakyanan. Kini aron nga ang mga motorista nga makakita masayod nga nag-parking ra diay ang mao nga sakyanan daplin sa karsada kay naguba ug dili mahitabo nga madam-agan.

Kon tinud-on lang pagpatuman sa Land Transportation Office (LTO) kini nga balaod puwerte’ng daghana nga motorista nga madakpan kay hapit sila’ng tanan walay EWD. Makita nimo taliwala sa karsada dapit sa eskena V. Gullas ug D. Jakosalem kagahapon, dunay passenger jeepney (PUJ) nga naabereya apan ang gigamit isip improvised EWD mao ang plastik nga basurahan.

Suwerte nga ang mga traffic enforcers nga sakop sa CITOM igo ra nga miagi-agi ug wala dakpa ang drayber. Wala tingali sila masayod sa balaod o kaha naluoy lang.

Ang lagda mao nga gawas sa mga motor ug traysikol, ang ubang motorista gimandoan gayud nga magtinil og Early Warning Device sa ilang mga sakyanan.

Sagad sa EWD nga gibaligya porma og triangle nga adunay reflector nga pula. Bisan tua pa sa layo ang nagsunod nga motorista makabantay na siya kon mabanwagan sa suga ang Early Warning Device. Dunay kaso nga miabot g’yud sa Korte Suprema. Ang trak de-karga nagub-an sa iyang makina ug napugos ang drayber sa pagpadaplin sa national highway.

Walay EWD ang mao nga drayber. Pagkagabii na, aksidente nga nadam-agan ug laing sakyanan ang trak de karga. Dunay mga namatay sa sakay nga midam-ag sa trak. Gitataw sa Supreme Court nga angay’ng manubag ang tag-iya ug ang drayber sa trak de-karga kay kon duna pay EWD nga gibutang sa likod nga bahin, hayan malikayan ang aksidente. (BANAT NEWS)