Usa ka semana tagal sa tubag sa 4 ka hepe

CEBU, Philippines - Gitagalan og usa ka semana ang upat ka hepe sa mga lungsod sa probinsya sa Sugbo nga gipanglungkab ang treasurer’s office sa munisipyo. Matud sa direktor sa Cebu  Provincial Police Office, Senior Supt. Noel Gillamac, nga pulos na nakadawat og memorandum ang hepe sa kapolisan sa lungsod sa Carmen, Compostela, Sogod ug Pinamungajan.

Iyang gilauman nga makahatag og tubag sa sunod semana.

Usa sa ipatin-aw ni Gillamac kon unsa ang ilang gibuhat nga aksyon sa mga nahitabong pagpanglungkab sa munisipyo sa ilang lugar og kon may suspek na ba ang kapolisan. Ang buhatan sa kapolisan sa maong mga lungsod anaa ra usab nahimutang tupad sa munisipyo.

Matud ni Gillamac nga kinahanglang kanunay nga alerto ang kapolisan bisan sa tugnaw nga panahon gumikan kay polis lang ang gibantayan sa mga badlongon.

Ang treasurer’s office sa munisipyo sa Pinamungajan ang katapusang nabiktima sa pagpanglungkab diin moabot sa P430 mil ang nadala sa mga kawatan. - /GMR) (BANAT NEWS)