Sakop sa CAFGU naghikog

CEBU, Philippines - Wala na’y kinabuhi nga nakit-an sa asawa nga nagbitay gamit ang pisi ang usa ka sakop sa Citizens Armed Forces Geographical Unit (CAFGU) niadtong Domingo sayo sa buntag Danasan, dakbayan sa

Danao.

Ang nagpakamatay naila nga si Luceno Catipay, 30, nagpuyo sa maong lugar.

Matud pa ni PO3 Nelson Pantoja sa Danao City Police Station nga hangtud karon blangko pa ang kapolisan ug ang asawa ni Catipay sa hinungdan sa iyang pagpakamatay.

Katapusang nakita nga buhi si Catipay niadtong gabii sa Sabado ug matud pa nga nananghid kini sa iyang asawa nga muadto sa basketball court sa ilang barangay aron mo-duty sa ilang detachment.

Daku nalang ang kahikurat sa asawa sa pagkabuntag sa Domingo diin sa pag-abli sa asawa sa pultahan sa kusina, iya nalang nakita nga nagbitay na ang iyang bana dapit sa abohan ug wala na’y kinabuhi.

Ang pisi gihigot sa iyang liog ug gibaat sa taas nga bahin maoy hinungdan nga nakabsan sa iyang kinabuhi.

Sumala pa ni Pantoja nga hangtud karon dili pa gyud makatuo ang pamilya sa maong sakop sa CAFGU nga nagpakamatay kini.

Gipaubos sa autopsy ang patay nga lawas ni Catipay aron mahibaw-an kung wala ba’y foul play sa iyang kamatayon. - /GMR) (BANAT NEWS)