Walo ka landslide natala, klase gisuspenso kagahapon
CEBU, Philippines - Ang Cebu City Disaster Risk Reduction and Management Council nakatala na og walo ka pagdahili sa yuta sa siyudad sa Sugbo sugod sa miaging Huwebes. Matud ni David Tumulak kinsa tagapangulo sa CCDRRMC, tungod kini sa padayong pag-ulan sa siyudad hinungdan sa maong kalamidad.
Lakip sa mga pagdahili sa yuta ang tulo ka sitio sa Barangay Sapangdaku, duha ka sitio sa Barangay Babag, Barangay Busay, Tagbao, ug sa Barangay Sudlon 2.
Tungod sa padayong dautan nga panahon, aduna ‘sab mga baha nga nasinati. Kini maoy hinungdan nga gideklara ni Mayor Michael Rama ang pagsuspenso sa klase sa tanang level sa pribado ug pampublikong eskuwelahan kagahapon.
Kini subay sa rekomendasyon ni Philippine Atmospheric Geophysical and Astronomical Services Administration (PAGASA)-Mactan weather bureau chief Oscar Tabada nga adunay low pressure area nga moigo sa Sugbo.
Sigon ni Rama nga mas maayong mangandam daan bahala og dili maabot, basta nakauli na ang mga bata sa ilang panimalay. Kahinumdoman nga sa milabay’ng semana, usa ka estudyante ang nalumos human gianod sa baha ug naabot sa dagat.
Matud ni Tumulak nga napahibalo na sa Command Center ang 80 ka barangay sa siyudad aron mangandam sa LPA kay wala pay kasiguradohan kon kanus-a mawala.
Iyang gipa-himangnuan ang mga barangay nga makig-coordinate sa city government pinaagi sa paggamit sa handheld radio.
Apan, mitug-an si Tumulak nga adunay mga barangay ang wala’y handheld radio tungod wala sila mopalit niini.
“By the time of disaster, nag-expect man ta og wala’y communication and wala’y landline, maong maka-standby sila sa atong emergency communication sa atong disaster frequency through sa handheld radio, pero naa may wala namalit.
Pwede raman unta na nilang ikuha sa disaster fund nila,” matud ni Tumulak.
Saysay niya nga ang mga barangay Bulacao, Budlaan, Day-as, Kamagayan, Lahug Adlaon, Malubog, Pulangbato, ug Sirao ang wala’y radio sukad Pebrero ning tuiga. - /EIM) (BANAT NEWS)
- Latest
