Gikulata, gidakdaka’g bato patay

CEBU, Philippines - Gitabangan og kulata sa unom ka mga tawo, gibundakan og bato ang nawong, giluba ang liog hangtud namatay ang usa ka lalaki  diha sa Barangay Luyang, San Remigio, niadtong Domingo sa alas 3:30 sa hapon.

Ang biktima nailhan nga si Saturnino Cualbar, 45, samtang nakasibat ug nakatug-an sa kapulisan ang kauban niini nga si Dominador Collamat, 21, pulos taga Sitio Aningan, Luyang, San Remigio.

Sa unom ka mga suspek,  upat palang ang mga nailhan nga sila si Reneboy Good Noynay, 40, Jerry Yurag, Macky Ecarma, ug Michael Yurag, pulos nagpuyo sa maong barangay.

Matud pa ni SPO1 Joe Johnnesky Ynot ang imbestigador sa San Remegio Police nga nahinabi sa Banat News kini mitug-an nga miadto sa maong lugar ang biktima kauban ang iyang anak-anak aron unta maningil og utang.

Ilang nalabyan sa kilid sa dalan ang mga suspek nga nag-inom ug nahitabo ang tinubagay. Atol sa pagpanguli na unta sa biktima, gigukod ug gibabagan kini sa mga suspek nga sila si Noynay ug Yurag ug matud pa dali nga gihawiran si Cualbar.

Ang mga kauban sa mga suspek ang dali ‘sab nga miapas ug gitabangan og kulata ang biktima, usa sa mga suspek nga si Macky Ecarma ang matud pa misinggit pa sa iyang kauban nga “Guniti nang anak-anak kay ato nang apilon.”

Sa pagkadungog ni Callamat, dali kini nga midagan ug gibiyaan si Cualbar nga iyang nakita nga gibundakan og bato ug giluba ang liog.  Sa gihimo nga follow up operation sa kapulisan ilang nasikop si Reneboy Noynay sa ilang panimalay. Matud pa ni Ynot nga ang suspek nangangkon nga nasuko sila sa biktima kay gipasingitan sila sa namatay nga isog kaayo.

Sumala pa ni Ynot nga lain sab nga suspek nga si Macky Ecarma ang matud pa nagpadala na sab kini og pahibalo nga mutahan sa kapulisan.  Kasong murder ang ipasaka sa kapulisan batok sa mga suspek, diin ang lima padayon pa nga gipangita sa kapulisan. - /EIM) (BANAT NEWS)