Gidunggab patay sa gikainom

CEBU, Philippines- Patay ang construction worker nga gidunggab sa gikainom nga kauban sa trabaho sa sityo Cambiohan, Casili, lungsod sa Consolacion alas dos pasado sa kagahapon sa kaadlawon.

Si SPO1 Francisco Perez sa Consolacion Police Station miila sa namatay nga si Rudy Suson, 42, taga Cawayan, Masbate.

Giila usab ni Perez ang nagdunggab nga si Rodel Brigete, taga Banilad, dakbayan sa Mandaue.

Matud ni Perez nga si Vicente Monterde nga kauban nilang trabahante ug gikauban sa inom miasoy nga pulos na hubog ang biktima ug suspetsado dihang nagkalalis.

Daw sa nagdali sa pagbarug ang suspetsado sa iyang gilingkuran ug nananghid nga molakaw una sa makadiyot ug pipila lang ka gutlo nibalik nga nagdala na og kutsilyo nga maoy gidunggab sa dughan sa biktima.

Daling misibat pahilayo ang suspetsado ug ang biktima daling gihatud sa Eversely Child Sanitarium General Hospital sa Jagobiao, dakbayan sa Mandaue apan gideklarar nga dead on arrival.

Kasong murder ang giandam nga kaso batok sa suspetsado. - /GMR) (BANAT NEWS)