Duha ka babaye gipamusil

CEBU, Philippines- Nalandig sa tambalanan ang duha ka babaye human nabiktima sa pagpamusil V. Rama Avenue, Calamba, dakbayan sa Sugbo niadtong Sabado sa udto.

Matud ni SPO4 Rey Cuyos nga target unta nga patyon sa usa ka gunman ang usa ka Janice Nabua, 32, nga taga Upper San Roque, Calamba apan ang laing babaye napagan nga si Lilia Ramos, 43, usa ka vendor nga taga Mahayahay, A. Lopez, sa maong lugar.

Sa inisyal nga imbestigasyon sa kapolisan nasayran nga samtang nagbarug si Nabua daplin sa karsada, kalit lang mihunong ang usa ka motorsiklo nga dunay sakay nga duha ka lalaki ug ang back rider ang nipusil kang Nabua.

Nakahigayun pa og dagan ang biktima hinungdan nga giusban sa pagpusil apan tayming nga miagi sa lugar si Ramos ug naigo sa iyang paa.

Daling gidala sa tambalan ang duha ka biktima samtang dali usab nga misibat ang gunman kauban ang drayber sa motorsiklo. Duha ka igo sa tiyan ug tulo sa abaga ang naangkon ni Nabua nga luwas na sa delikadong kahimtang.

Matud ni Cuyos nga posibleng anggulo sa drugas ang hinungdan sa maong pagpamusil.

Nakuha sa crime scene ang duha ka basiyo sa .45 caliber pistol nga gituohang gigamit sa mamumono. - /GMR) (BANAT NEWS)