Babaye naghikog atubangan sa mga anak
CEBU, Philippines- Patay na nga nakit-an sa inahan sa iyang kapuyo ang usa ka babaye human naghikog gamit ang pisi sa sitio Managoksok, Bonbon, dakbayan sa Sugbo alas 10:30 sa buntag niadtong Sabado. Ang naghikog patay naila nga si Eden Cejas, 26, dunay kapuyo ug nagpuyo sa maong lugar.
Matud ni SPO4 Rey Cuyos sa homicide section sa Cebu City Police Office nga gumikan sa depresyon ang usa sa hinungdan nga nakita sa kapolisan nga naghikog si Cejas.
Ang inahan sa kapuyo nga si Natividad Ministerio maoy nakadiskubre sa patay’ng lawas ni Cejas human nga misulod sa balay aron pagsubay nganong nagsige og hilak ang mga anak nga nag-edad 2 ug 6 anyos.
Daku nalang ang kahibulong ni Ministerio nga iyang nakita nga nagbitay na si Cejas gamit ang pisi ug wala na’y kinabuhi.
Matud ni Cuyos nga posibleng gihimo ni Cejas ang paghikog atubangan sa iyang mga anak human nga nagsige nalang kini og hilak nga nagtan-aw sa ilang inahan.
Duna’y nakuha nga impormasyon ang taga homicide section nga problema sa pamilya nga misangpot sa depresyon maoy natukmod sa babaye nga maghikog patay. - /GMR) (BANAT NEWS)
- Latest
