Gibuwagan sa uyab naghikog
CEBU, Philippines - Tungod kay gibuwagan sa uyab, usa ka 19-anyos nga lalaki ang naghikog pinaagi sa pagbitay sa ilang kusina sa lungsod sa Pinamungajan niadtong Biyernes sa hapon.
Ang lalaki naila nga si Jayson Oloverio, taga sitio Mabini 2, Tajao sa maong lungsod.
Base sa imbestigasyon sa kapolisan nasayran nga ang inahan nga si Merln natulog sa sayong kahaponon apan sa iyang pagmata nagbitay na sa pisi ang iyang anak nga wala na’y kinabuhi.
Daling mitawag ang inahan og kapolisan kinsa dali usab nga miresponde sa alarma.
Ang inahan mismo ang mitug-an nga posible nga ang panagbuwag sa iyang anak ug sa iyang uyab nga si Judith nga taga Ormoc ang hinungdan sa iyang pagpakamatay.
Matud pa nga ang ilang panagbuwag gikasubo kaayo sa iyang anak.
Ang kapolisan nga miresponde sa alarma mitambag sa inahan nga ipa-ilawom sa autopsy ang iyang anak aron masusi kon wala ba’y foul play ang kamatayon. (BANAT NEWS)
- Latest
