Bag-ong namaye nadisgrasya patay

CEBU, Philippines - Patay ang usa ka lalaki human nibuto ang motorsiklo nga iyang gisakyan dihang nibangga sa usa ka Toyota Avanza pasado alas 12:00 sa tungang gabii niadtong Biyernes sa lungsod sa Balamban.

Ang namatay naila nga si Eugene Apas, 30, taga Riverside, barangay Nangka sa maong lungsod.

Si PO2 Donard Pitogo sa Balamban Police Station miingon nga ang biktima padulong sa dakbayan sa Toledo.

Dihang ni-overtake sa usa ka motorsiklo, nabangga sa usa ka Toyota Avanza nga gimaneho ni Rebestiane Libumfacil nga taga Ibo, dakbayan sa Toledo.

Matud ni Pitogo nga nipilit ang biktima sa walang bahin sa atubangan sa sakyanan ug maayong pagkapikas sa iyang nawong ug milugwa ang mata niini.

Dugang ni Pitogo nga patay diha-diha ang biktima samtang nalabay ang iyang motorsiklo pipila ka metros ang gilay-on.

Base sa follow-up investigation sa kapolisan nga kagahapon pa sa buntag nailhan ang patay nga lawas pinaagi sa pangasaw-onon sa biktima nga iyang gipamay-an niadto lang Martes kinsa nangita kaniya tungod kay wala na mauli sa ila sa miaging gabii.

Matud ni Pitogo nga gikan nang-ihaw og baboy ang biktima tungod kay piyesta sa ilang dapit apan nanghuwam kini og motorsiklo kay may kuhaon.

Mibalibad pa unta ang tag-iya sa motorsiklo tungod kay wala’y gasolina apan ang biktima giingong mao’y nagpagasolina.

Buntag na lang wala gihapon mauli ang biktima hinungdan nga ang pangasaw-onon miadto sa buhatan sa kapolisan aron mangutana kung wala ba’y nadisgrasya nga lalaki nga nagmotorsiklo.

Daku na lang ang kahingangha nga ang iyang gipangita patay na tungod sa disgrasya.

Ang drayber sa Avanza sumala pa ni Pitogo nga gibuhian sa kapolisan kagahapon sa alas 3:00 sa hapon human nagkasinabot sila sa pamilya sa biktima nga abagahon niini ang galastohan sa pagpalubong sa biktima. (BANAT NEWS)