Mga sapa naalihan

CEBU, Philippines - Napulo ka mga dagkong patigayon sa dakbayan sa Sugbo ang giingong nakalapas sa “three meters easement zone” sa mga sapa, uban kanila nahimutang sa downtown area ug ang uban naa sa may uptown Cebu City.

Si Atty. Mary Rose Salvatiera sa Cebu City Legal Office mibutyag nga ang siyudad moisyu og “notice of violation” sa maong napulo ka dagkong patigayon sa dakbayan tungod kay wala kini makatuman sa “three meters easement” kini subay sa Article 638 sa Civil Code of the Philippines.

Ang Article 638 nagkanayon nga “the bank of rivers and streams, even in case they are of private ownership, are subject throughout their entire length and within a zone of three (3) meters along their margins, to the easement of public use in the general interest of navigation, floatage, fishing and salvage.”

Ang siyudad gikatakdang mopahigayon og meeting tali sa mga stakeholders diin tukion ang maong problema. Dugang ni Salvatiera nga ang dili motuman unya sa ilang gikasabutan sa meeting posibleng pasakaan og kaso sa siyudad.

Sa laing bahin, si Bise Mayor Edgardo Labella nagkanayon nga usa ka dakung hagit sa mga opisyal sa gobiyerno ang problema sa baha ug trapiko.

Matud ni Labella nga nagkinahanglan usab sila og tabang sa kabarangayan  aron limpiyohan ang mga imburnal ug kasapaan sa ilang lugar. (/EIM)(BANAT NEWS)