P.5M shabu ‘sakmit
CEBU, Philippines - Operasyon sa kapolisan sa dakbayan sa Sugbo batok illegal drugs miresulta sa pagkasikop sa kapin tunga sa milyon ka pesos nga drugas sugod sa miaging gabii hangtud kagahapon sa buntag.
Pinasikad sa usa ka search warrant gisikop sa kapulisan sa Police Station 6, San Nicolas Police Station ang usa ka gidudahang level 2 drug pusher nga si Armando Belamia, 42, ug nakuhaan og mga pinaketeng drugas nga nagkantidad og P500 mil sa balay niini sa Sitio Lawis, Pasil,Cebu City.
Si Senior Inspector Chuck Barandog ang hepe sa San Nicolas Police nga nahinabi sa Banat News mitug-an nga human makompirmar nga namaligya kini og shabu, mikuha sila og search warrant kang Regional Trial Court (RTC) Judge Wilfredo Navarro sa Branch 19. Nakuha sa kapulisan sulod sa balay ni Belamia ang 40 ka gagmay nga pakete, 11 ka medium size ug duha ka “large pack” nga pulos dunay sud nga gituohang shabu ug usa ka .38 revolver nga duna’y sulod nga mga bala.
Samtang ang City Intelligence Branch (CIB) sa CCPO nakadakop kang Harold Baratbate Solon, 45, diha sa Purok 8, Barangay Kamputhaw ug nakuhaan og 33 ka gagmay nga pakete sa drugas nga nagkantidad P10 mil ug usa ka .45 caliber pistol nga dunay pito ka bala.
Samtang ang kapulisan sa Carbon, nadakpan ang usa ka notadong drug pusher sa Ermita Proper, Ermita sa usa ka buy-bust operation nga gipangulohan sa deputy chief sa Carbon Police nga si Inspector Jonathan Dela Cerna.
Ang dinakpan naila nga si Glenn Villegas, 45, nga nakuhaan og tulo ka gagmay nga pakete ug lima ka medium size ug usa ka taas nga plastic nga dunay sulod nga gitohuang drugas. Ang mga dinakpan pasakaan og kasong kalapasan sa R.A 9165. (/EIM)(BANAT NEWS)
- Latest
