Managpuyo nga pusher nasikop

CEBU, Philippines - Nasakmit ang armas, mga pinaketeng shabu ug drug paraphernalia gikan sa managpuyo nga suspetsadong pusher nga nadakpan sa Upper Aroma, Subangdaku, dakbayan sa Mandaue niadtong Martes sa gabii.

Si Senior Insp. Miguel Andesa, hepe sa Presinto 2 sa Mandaue City Police Office (MCPO), miila sa mga dinakpan nga sila si Serge Uy, 52 ug Marissa Ycong, 46.

Nasakmit ang upat ka paketeng shabu, 18 ka disposable lighters, 22 kalibre nga armas nga wala’y lisensiya ug tulo ka bala, 20 ka tin foil ug uban pa’ng mga drug paraphernalia.

Si Andesa nga nahinabi sa Banat News miingon nga si Ycong nag-atubang na og kaso sa ilegal nga drugas nga  ilang nasuta sa pakisusi sa warrant of arrest  nga giluwatan sa korte.

Kapin sa usa ka semana ang gihimong pagpaniid sa mga dinakpan una pa gipahigayun ang buy-bust operation. (BANAT NEWS)