Laing LBC branch gitulis

CEBU, Philippines- Lain na usab nga sangang buhatan sa LBC ang gitulis ug ning tungora ang LBC Subangdako sa dakbayan sa Mandaue maoy gipuntariya sa  duha ka mga tulisan ug gisakiyo ang P15,000 nga salapi ug mga cellphone sa duha ka mga kawani kagahapon sa buntag. Si SPO1 Michael Limalima sa kapolisan sa Presinto 2 sa Mandaue City Police Office (MCPO) nagkanayon si Queene Pie Diaz, 21, mao ray nahibilin sa establisamento dihang nanulod ang mga tulisan nga pulos nagsul-ob og t-shirts ug nag-short pants.

Matud pa pagtimbaya pa lang ni Diaz, gitionan dayon kini og armas ug mideklarar og tulis, gikuha sa mga tulisan ang kinitaang kwarta ug shoulder bag niini nga may sulod nga cellphone ug P300 dayon gimandoan kini pagsulod sa kasilyas.

Apan sa dayong gawas sa duha, nakit-an nila ang selpon sa laing kawani nga si Sheana Mae Uy, 22, nga nipalit og pagkaon para paniudto nilang duha diha sa atbang.

Nasayran nga wa gihapoy gwardiya ang maong establisamento sama sa ubang mga sangang buhatan niini nga gipangtulis sa nangaging mga adlaw, nasuta nga duna kini closed-circuit television camera apan wala mag-andar nianang tungora. - /EIM) (BANAT NEWS)