Wala pa’y nakamulta’g milyon

CEBU, Philippines - Wala pa g’yuy bisan usa nga nakamulta og P1 milyon niadto’ng mga tag-iya og kolorum nga bus pasaheroan nga nasakpan sa mga sakop sa Land Transportation Office (LTO).

Si LTO-7 Regional Director Arnel Tancinco miingon nga ang uban sa mga operator nga ilang nasakpan nga mi-operate og colorum nga bus, miapelar pa didto sa Department of Transportation and Communications.

Matud ni Tancinco nga ang Sunrays Bus Line ra maoy mibayad og multa kay nasakpan nga lahi ang makina sa ilang bus kon itandi sa napatik diha sa rehestro sa sakyanan.

Apan dili usa ka milyon ka pesos ang multa nga gibayran sa Sunrays Bus Lines kay ang ilang kalapasan dili kolorum. Nasuta nga rehestrado ang ilang bus apan giilisan nila ang makina nga wala mangayo’g pagtugot.

Ang pagpahamtang og P1  milyon nga multa sa masakpan nga nag-operate og colorum nga bus kabahin kini sa kontrobersyal kaayo nga Joint Administrative Order 2014-01.—RUB (BANAT NEWS)