Pamilya gibanhigan sa paryenteng menor
CEBU, Philippines - Usa ka pamilya gipamusil sa ilaha rang kadugo nga menor de edad nga giingong nanimalos tungod sa karaang panagbangi sa iyang mga ginikanan ug sa mga biktima. Ang pagpamusil nahitabo sa Barangay Pulpogan, Consolacion nga miresulta sa pagkaangol nila ni Felomina ug Eduardo Quimod, pulos 58 anyos ug ilang anak nga si Jeffrey Quimod, 37 anyos.
Si PO3 Arthur Ariate nagkanayon nga padayon pa nilang gipangita ang 17-anyos nga armado og kalibre 45 pistola nga maoy gigamit niini sa pagpamusil.
Ang magtiayong Quimod giingong nanglakaw pauli na sa ilang balay dihang kalit giatangan sa suspek ug gipamusil. Si Jeffrey dali untang mitabang sa ginikanan apan giapil usab kini pagpusil. Hinuon pulos lamang sa bukton, kamot ug paa ang samad sa mga biktima ug gidala na sa tambalanan.
Lima ka mga kabhang sa bala sa kalibre 45 ang nakuha diha sa crime scene. Ang suspetsado matud pang Ariarte, ‘bagis’ sa ilang dapit tungod kay makadaghan na silang nakadawat og reklamo sa pagpanghagis niini. (BANAT NEWS)
- Latest
